CEBU, Philippines - Dugang sa mga bayranan sa Kapitolyo sa dili pa moasumer ang bag-ong gobernador karong Hunyo 30 ang P425,000 nga bayronon sa scholarship program sa St. Theresa’s College. Ang scholarship program gipasiugdahan sa suspendidong gobernador Gwendolyn Garcia niadtong 2010 sa pagpakig-tambayayong sa STC Alumni Foundation, Inc.
Ang presidenti sa Foundation nga si Marissa Fernan ang nihatud sa billing niadtong Biyernes sa buhatan sa kasamtangang gobernador, Bise-Gob. Agnes Magpale.
Dili sama sa ubang utang sa Kapitolyo sa panahon ni Garcia, andam si Magpale nga mobayad sa maong bayronon human niya nakita nga kompleto ang mga dokumento niini.
“I think it’s a very laudable, basta anything sa education wa man mi . . . pagtan-aw sa papeles okey man so I ask the treasurer to pay,†matud pa ni Magpale.
Ang maong kantidad nga P425,000 alang sa kapin napulo ka mga scholars sa STC sa tuig 2011 hangtud 2013.
Giklaro ni Magpale nga ang mga maayong programa ni Garcia iya kining ipadayun.
“I want to emphasize nga ang mga maayong programa minus the abuses ba nga gigamit atong ipadayun,†sumala pa ni Magpale. Bag-ohay lang, gitugotan na si Magpale sa hunta probinsiyal nga ipadayun ang scholarship program alang sa mga high school valedictorian ug salutatorian nga gisugdan ni Garcia. (BANAT NEWS)