CEBU, Philippines - Patay ang usa ka lalaki human kini makuryentihi samtang nagluto og kugita, ug naangol usab ang kauban niini didto sa Sitio Grayrock, barangay Pandan, dakbayan sa Naga sa miaging hapon. Ang namatay nailhan nga si Erick Apolinar, 29, samtang ang naangol mao si Rolando Dacumos.
Sa pakighinabi sa Banat News ni PO1 Sylvano Bascones sa Naga Police Station nasuta nga ang kaubanan ni Apolinar nga sila si Dacumos, Letecia Aragon ug nailhan lang sa ngalang Valentino ang giingong nagluto og kugita sulod sa ilang trabahoan.
Giingong adunay nabantayan ang upat nga susama sa adunay depekto sa ilang pagluto hinungdan nga ilang gihaon ang gilutoan nila sa kugita. Apan dihang gihaon na kini, giingong kalit lang nga nakuryentihan si Dacumos , ug dali kining nakabuhi sa gigunitan nga gilutoan sa kugita apan si Erick giingong wala kini makabuhi bisan pa man ug daling giibot ni Valentino ang plug sa kuryenti.
Daling gidala sa South General Hospital si Apolinar apan giingong nakabsan gyud kini sa iyang kinabuhi. Matud pa ni Bascones nga ila pang gisuta kun unsa ang hinungdan nga nakuryentihan ang biktima. (BANAT NEWS)