Korean nangulata gisikop ug gipriso

CEBU, Philippines - Gibalhog  sa detention cell sa kapolisan ang usa ka Korean national nga ilang  nadakpan human mangulata sa  kauban  niining   Koreano  ra  usab sulod  sa   Chicken Restaurant sa  Shang commercial complex sa barangay Maribago, dakbayan sa Lapulapu   sa  miaging kaadlawon.

Ang gidakop mao si Yu Kwan Huang, 47, nga nagtrabaho isip dive instructor sa barangay Maribago ug temporaryong nagpuyo sa Pacific Villa Subdivision sa lungsod sa Cordova.

Ang biktima nga gikulata sa suspetsado mao si Pong Wong Choy,  Koreano  usab, hingkod, ug nagpuyo sa barangay Pajac sa maong dakbayan.

Si PO2 Erly Brady sa kapolisan sa  Intelligence Division sa kapolisan sa maong dakbayan nga nahinabi sa Banat News miingon nga nag-inom sa nag-atbang nga lamesa ang duha ka grupo sa mga Koreano sa sulod sa Chicken       Restaurant.

Dihang nahubog na, kalit lang gitawag sa suspetsado ang biktima sa atubangan sa gikainom  niyang  mga  Koreano  usab   ug gipasiatab niini nga ang biktima nagluhodluhod ngadto kaniya sa pagpangayo  og  pasaylo.

Apan  ang biktima nga si Pong Wong Choy kusganong mihimakak  ngadto sa gikainom sa suspetsado nga nangayo kini og pasaylo tungod kay wala man siya makahimo    og sala niini.

Daw nainsulto ang suspetsado sa pagpanghimakak sa biktima sa atubangan sa mga kauban niya  sa inom maoy hinungdan nga nasuko ug nanghulga pa nga kulatahon.

Ang biktima nga nakamatikod nga isog na kaayo  nga  mihulga, mihangyo nga adto sila sa gawas mag-estorya  kay natugaw na ang  ubang   customer tungod sa kusog kaayong tingog niini.

Dihang didto na sila sa gawas kalit lang gikulata sa suspetsado ang biktima ug gikabay-an pa niini bisan kun nahagba na kini sa yuta ug nagpadayon sa iyang pagpangulata.

Matud pa ni PO2 Brady nga nahiagi ang team sa intelligence section sa kapolisan sa maong dakbayan nga gipangulohan ni Senior Inspector Rogelio Pineda ug dali nga midakop sa maong suspetsado ug gibalhog sa bilanggoan.

Ang suspetsado  gitakdang pasakaan og kaso  karong  adlawa   ug  posible nga mag-atubang kini   og  kaso  nga alarm  scandal, resisting arrest, drunkenees ug physical injuries. (/WC) (BANAT NEWS)