Yellow submarine motuman sa lagda

CEBU, Philippines - Andam nga motuman ang tagdumala sa Cebu Yellow Submarine (CYS) sa mga lagda sa local nga kagamhanan sa dakbayan sa Lapulapu human temporaryong gihatagan og pagtugot ang maong sakyanan sa dagat nga makalawig ilawom sa kadagatan  sa maong  dakbayan.

Kini ang giluwatang pamahayag ni Agnes Escano, consultant sa  CYS Cebu atol sa usa ka press conference sa Imperial Palace sa dakbayan sa Lapulapu.

Sayo niini si Lapulapu City Mayor Paz Radaza mipadayag nga human gisumiter sa mga sakop sa Coastal Conservation and Environment Foundation (CCEF) diin nagpamatuod nga naguba gyud ang pipila ka gasang ilawom sa Kontiki wall sa brgy. Maribago dakbayan sa Lapulapu.

Gikalipay ni Mayor Radaza ang pamahayag sa tagdumala sa CYS nga andam silang mosagubang sa danyos niini ug mosunod sa mga bag-ong lagda nga ipatuman sa operasyon sa maong submarine ilawom sa dagat.

Gumikan niini nakahukom si Mayor Radaza nga kasamtangang bakwion niini ang cease and desist order  ug hatagan og temporaryong pagtugot nga makabalik sa ilang operasyon ang CYS.

Matud pa ni Atty. Yuri Binluan ug Atty. Ethelbert Ouano sa City Legal office sa dakbayan sa Lapulapu  nga base sa finding sa Coastal Conservation Education Foundation o CCEF, nasuta nga dako ang kadaut sa mga gasang ilawom sa 25 ka tiil nga giladmon sa Kontiki wall ug mogasto kini og P250 mil  sa pagpaayo niini ug sa mga tawo nga mag-monitor sa maong dapit.

Usa sa gihatag nga solusyon sa mga sakop sa CCEF mao ang pagbutang og marine epoxy sa mga gasang nga nabali apan buhi pa kini ug pwede pang mabalik sa iyang natural nga kahimtang.

Atol unya sa pagbalik sa operasyon sa yellow submarine adunay tawo sa  dakbayan sa Lapulapu nga mokuyog sa mga biyahe niini aron masuta kun misunod ba sa hustong lagda  ang  maong        submarino.

Dinhi usab kuhaon ang mga basehanan sa pagpanday og balaod alang sa ordinansa nga pagahimoon alang sa pag-regulate sa mga sakyanan sa dagat sama sa CYS. (/WC) (BANAT NEWS)