Marijuana planter pasakaa’g kaso nga illegal possession of firearm

CEBU, Philippines - Nadakpan ang usa ka marijuana planter nga nalutsan og warrant of arrest sa korte didto sa bukirang bahin sa Sitio Cabancalan, barangay Caleriohan lungsod sa Dalaguete,  sa miaging  gabii .

Ang nadakpan sa gilusad nga operasyon sa kapolisan mao ang suspek nga si Roberto Enopia alyas Berting, hingkod,  ug nagpuyo sa maong lugar nga maoy nakabutang nga tinuoray’ng  ngalan  diha sa warrant of arrest nga pirmado ni Judge Maximo Perez.

Si PO2 Godofredo Glepa sa Dalaguete Police   Station mibutyag  sa Banat News  nga  lahi ang ngalan nga gitug-an sa suspek dihang kini nadakpan.

Gisukit  siya  ug  ang   iyang  gitug-an nga ngalan  mao ang usa  kaVictoriano Enopia alyas Berting.

Ang hepe sa Dalaguete Police   Station  nga  si Insp. Dexter Basiergo maoy nanguna  sa operasyon pagtungas sa bukid aron i-serve ang warrant of arrest.

Wala makabantay ang suspek dihang gi-ukoy kini sa mga polis didto sa iyang pinuy-anan ug gidakop human i-presentar  ang arrest warrant.

Samtang   siya  girekesa,   nakuhaan pa usab  siya  og kalibre .38   nga  revolver  nga giluklok sa iyang hawakan nga adunay  duha ka buhing bala ug wala   usab  siya’y  gipakitang dokumento niini. Ang suspek gibalhug na  karon sa karsel sa kapolisan ug gitakda kining i-presentar  sa  korte ug pasakaan pa  og dugang kaso nga illegal possession of firearms.

Ang suspek gitumbok   nga dunay plantasyon sa marijuana sa bukirang bahin sa maong lugar.(/WC) (BANAT NEWS)