CEBU, Philippines - Patay nang nadangat sa tambalanan ang 61- anyos nga lolo nga giatangan sa iyang pagpauli sa balay samtang nagmaneho sa iyang motorsiklo didto sa barangay Atop Atop sa lungsod sa Bantayan sa isla sa Bantayan alas 3:45 sa hapon niadtong Miyerkules.
Ang biktima nga si Renato Marianito, 61, nagpuyo sa maong lugar gikan pa mitambong sa husay sa kaso bahin sa iyang yuta diha sa Municipal Trial Court in Cities kon MTCC sa Bantayan dihang gipatay.
Tulo ka mga lalaki nga sakay og usa ka motorsiklo ang giingong migukod sa biktima ug mipusil kaniya.
Matud ni PO1 Clyde Andales sa Bantayan Police Station dihang nahinabi sa Banat News dunay kasong giatubang ang biktima nga gipasaka sa mga paryente niini kabahin sa ilang yuta.
Nakaambak pa sa motor ang biktima bisan og samaron ug misuway og dagan apan naapsan ug gitiwasan sa duha ka gunman.
Ang biktima nakaangkon og samad pinusilan sa dughan, abaga, ug duha niini ka mga paa ug patay na pag-abot sa Bantayan District Hospital. Ang kapulisan padayun pa karung miila sa mga mamumuno ug usa sa ilang gitutukan mao ang kasong giatubang sa namatay. (/EIM) (BANAT NEWS)