CEBU, Philippines - Human sa duha ka adlaw nga subsob nga pagpangita sa responsable sa pagpusil patay ni Argao outgoing councilor Joaqin Banosong, kagahapon sa hapon, nasikop sa kapolisan ang gitumbok nga gunman niini. Si Reynaldo Destacamento nga adunay daghang ngalan susama na lang sa ‘Lloyd’; Al Vallejos; ug Alvarino Vallejos Asil maoy gidakop sa kapolisan human gitumbok nga maoy mipusil sa biktima.
Sa pakighinabi sa Banat News sa hepe sa kapolisan sa lalawigan sa Sugbo, Sr. Supt. Patrocinio Comendador mipadayag kini nga aduna sila’y tulo ka witnesses nga gihuptan , ang usa niini diha sa duol sa gunman atol sa pagpamusil.
Pinaagi sa artist sketch nasubay sa Provincial Intelligence Branch sa rogues gallery ang kaparehas og dagway sa artist sketch ug dihang gipakita sa testigo gitumbok niini ang hulagway ni Destacamento.
Kagahapon, giadto sa kapolisan ang pinuy-anan ni Destacamento apan wala kini didto apan natultulan gihapon nila kini sa Jones Avenue sa Cebu City.
Sa pag-abot pa lang ni Destacamento sa CPPO gitudlo kini dayon sa saksi nga mao gyuy mipusil sa konsehal. Sunod nga subayon sa kapolisan kun si kinsa ang mastermind.
Sumala pang Comendador dunay mga impormasyong nakuha ang kapolisan nga dunay criminal records si Destacamento ug nalambigit kini sa gun for hire ug estilo niini nga dili magtaptap sa nawong sama sa iyang gihimo sa pagtira sa konsehal.
Gisaad ni Comendador nga dili sila mohunong hangtod nga dili nila matultulan ang utok sa pagpusil patay kang Banosong.
Samtang si Destacamento nga gikuhaan sa iyang habig, igo lang kini nga miingon nga naalaan lang siya ug wala na gyud kini mihatag og dugang pang komento.(/EIM) (BANAT NEWS)