Driver gipusil patay

CEBU, Philippines - Gipusil hangtud nga namatay ang   drayber  sa habalhabal  nga tulo ka semana pang nakagawas sa prisohan sa iyang pagpamalit og sigarilyo didto sa merkado sa barangay Poblacion sa lungsod sa Barili niadtong Martes sa alas 8:05 sa gabii.

Ang biktima nga patay nang nadangat sa tambalanan mao si Rene Sambitan, hingkod,   nag-drive  og habal- habal, ug nagpuyo sa barangay Gunting, Barili.

Nakagawas sa bilanggo-an ang biktima human makabutang og pyansa sa kasong physical injury in relation to R.A. 7610 kon child abuse tungod sa pagpangulata niini sa iyang kaugalingong anak lalaki.

Ang suspek gihulagway lang sa mga nakasaksi nga naka jacket og kolor itom  nga nagsakay usab og motorsiklo nga Honda wave kolor itom ug way plate number.

Si SPO1 Henie Aspera sa Barili Police Station nga  nahinabi sa Banat News miingon  nga ang biktima namalit og sigarilyo sa tindahan sulod sa merkado .

Apan sa iyang  paggawas, kalit lang niabot ang suspek nga sakay usab og motor  dayung hunong ug nagdaling mikanaog.

Sa way daghang pangutana milanit  dayon sa armas ang suspek  ug  gipusil makadaghang higayun ang biktima sa dul-it nga posisyon.

Nakaangkon kini og daghang samad pinusilan sa lawas ug  sa  pagkahagba   sa biktima mibalik   dayon og sakay sa motor  ug mipahilayo ang suspek.

Ang kapolisan nga mirespondi mihatud dayun sa biktima sa Barili District Hospital apan didto kini ideklarar nga Dead on Arrival (DOA).

Ang kapolisan nakapunit  og kabhang sa bala sa 9mm pistol ug duha ka nalumping  nga  bala, cell phone.

Padayon pang mihimo og subsob nga imbestigasyon sa maong panghitabo aron matumbok ang motibo sa krimin ug mailhan ang mamumuno. (BANAT NEWS)