Job order di ipadawat sa Talisay

CEBU, Philippines - Mga job order sa city hall sa dakbayan sa Talisay misamot ang gibating kabalaka nga dili na gyud makabalik pa sa ilang trabaho tungod sa mikatap nga suwat karon diha sa city hall.

Ang maong suwat gikan kini sa bag-ong napiling mayor nga si Johnny Delos Reyes kinsa mipahinumdum sa outgoing mayor nga si Socrates Fernandez nga dili na padawaton og mga job order.

Si Delos Reyes sa iyang suwat ngadto kang Fernandez nagkanayon kini nga “in due time, our new set of working force in the city government of Talisay will assume their post that appointing job orders in the mayor’s office be put to cease”.

Ang incoming nga mayor miawhag usab kini kang Fernandez nga mohatag og samang kamanduan ngadto sa mga department head nga dili na manawat og mga JO.

Mabantayan nga kasagaran sa mga outgoing nga administrasyon human sa eleksiyon manawat kini og daghang job order o casual employee diin sa maong sitwasyon ang incoming nga administrasyon mabutang sa alanganin tungod kay mapugos man sila sa pagpanaktak sa mga JO nga gidawat sa outgoing nga mga opisyal aron ipuli usab ang ilang mga supporter.

Karong umaabot Hunyo 30, 2013 sa alas 12:00 sa udto ang outgoing nga opisyal mokanaog na kini sa pwesto ug mopuli na ang mga bag-ong napiling opisyal.

Ug sa maong adlaw usab ang mga JO ug casual employee nga gidawat sa outgoing nga administrasyon mawagtangan na usab kini sa ilang mga trabaho.

Kagahapon mabantayan ang magul-anon nga mga panagway sa mga JO diha sa city hall human sila makabasa sa mikatap nga kopya sa suwat.

Si Fernandez sa iyang bahin, nagkanayon nga ang mga JO nakasabot kini nga kung bag-o na ang administrasyon manaktak gyud kini og mga kawani.

Matud ni Fernandez nga human sa Hunyo 30 wala na siya’y gahom nga modawat og mga JO tungod kay matapos na ang iyang termino sa maong adlaw.

Gawas niini gilauman usab ang mga kausaban diha sa city hall inig puli na sa bag-ong administrasyon.

Karon ang city hall duna kini sobra sa 1,000 ka mga JO ug kasagaran kanila ubos sa quota sa mga outgoing nga opisyal. Kasagaran sa maong mga JO nagtrabaho diha sa city hall sobra na sa tulo ka tuig ug karong Hunyo 30, 2013 matapos na ang ilang kontrata. (BANAT NEWS)