CEBU, Philippines - Kagatosan ka mga estudyante ang nagpanon ngadto sa 25 ka public elementary ug 18 ka public high school sa dakbayan sa Talisay kagahapon sa buntag ang unang adlaw sa klase niining tuiga.
Matud pa ni Dr. Woodrow Denuyo, Talisay City Schools Division superintendent, nga ang gidaghanon sa maong mga estudyante nga misulod sa klase kagahapon madugangan pa sa maghinapos kining semanaha tungod sa mga "walk-in" nga mga estudyante nga wala pa ma-enroll sa w ala pa magsugod ang klase kagahapon.
Miingon si Denuyo nga ang mga principal sa public elementary ug sa high school gimandoan sa pagdawat sa mga estudyante nga maulahi sa pagpa-enrol bisan pa sa pagnihit sa mga lawak klasehanan.
Sayo niini ang DepEd mipagawas og kamandoan nga nagdili sa mga publikong eskuylahan sa pagbalibad sa mga ulahing magpalista.
Sa pagkakaron gisagop sa DepEd sa Talisay ang “double shift program†gumikan sa pagdaghan sa populasyon sa mga estudyante samtang nihit ang mga lawak klasehanan.
Adunay upat ka mga tulunghaan ang misagop sa double shifting nga mao ang Talisay National High School, Talisay Central School, Bulacao National High School ug Lawaan National High School.
Sa maong programa duha ka klase sa usa ka classroom nga himoon sa alas 6:00 sa buntag ngadto sa alas 12:00 sa udto ug ang usa, gikan sa ala 1:00 sa hapon ngadto sa alas 6:00 sa gabii. (BANAT NEWS)