Mylene Manto
CEBU, Philippines - Gitugutan sa korte nga makapresentar og dugang mga testigos ang prosekusyon sa kasong kidnapping with homicide nga gipasaka batok kang Bella Ruby Santos ug uyab niining si Ian Charles Griffiths. Sila si Atty. Rameses Villagonzalo ug Atty. Julius Caesar Entise sa depensa misuway unta sa pagbabag sa hangyo sa prosekusyon tungod kay duna na silay kasabotan nga si Police Senior Inspector Leonedes Casul, ang pangulo sa Scene of the Crime Operatives (SOCO) mao na ang kataposang prosecution witness.Apan matod ni Judge Ester Veloso sa Regional Trial Court (RTC) Branch 6 nga “in the interest of justice†tugutan ang prosekusyon sa ilang hangyo.
Si Atty. Inocencio dela Cerna mihangyo nga dugangan og lima ka testigos ang ilang habig aron mapalig-on ang ilang kaso.
Kagahapon gipresentar sa prosekusyon si Casul sa korte. Matud ni Casul nga niadtong Pebrero 9, 2011 nakadawat siya’g tawag gikan sa Barili Police Station nagpahibaw nga naay patay’ng lawas sa Sayaw Beach.
Sa pag-abot sa crime scene gi-cordon na ang crime scene ug diha-diha nanguha sila og mga hulagway, nag- markings ug sketch nga kabahin sa ilang pagproseso sa crime scene.
Dugang pa niya nga ilang gikuha ang lawas sa biktima nga giputos og “yellowish†nga habol. Sumala pa niya nga wala nila kini gitangtangan sa putos tungod kay dunay daghang mga tawo ug didto na nila kini buhata sa funeral parlor sa Ronda. Sumala pa niya, wala siya makaila sa bata ug nailhan lang kini dihang miabot ang usa ka lalaking nagpaila nga ang biktima mao si Ellah Joy Pique,ang lalaki mao si Renante Pique.
Gawas sa maong habol, duna sad silay nakuhang dagkong bato ug gi turnover nila kini sa Barili Police Station. Matud niya wala nila gidala sa crime laboratory ang maong bato kay wala man sila’y nakita nga visible evidence niini. Sa interbyu, si Santos nagkanayon nga malipayon siya sa iyang kinabuhi karon. Matud niya busy siya sa pagtambong sa mga kalihokan sa simbahan.
Si Ellah Joy Pique, nawala niadtong Pebrero 8, 2011 samtang padung na mouli sa ila gikan sa eskuylahan, patay na siya dihang nakit-an pagkasunod adlaw didto sa lungsod sa Barili. Gitakda ang sunod nga hearing sa kaso karong Hulyo 22, 2013. (BANAT NEWS)
- Latest
