CEBU, Philippines - Mga residente ug mga patigayon sa barangay Bulacao, dakbayan sa Talisay pabayaron og multa kung maghugaw-hugaw kini diha sa ilang barangay.
Sa milabay’ng mga adlaw ang konseho sa barangay miaproba kini og ordinansa kabahin sa pag-implementar sa pagpanglimpiyo diha sa palibot sa barangay paglikay sa mga sakit ilabi na sa mga lamok nga nagdala og dengue.
Sulod sa 10-meters radius gikan sa property lines, ang mga residente sa barangay lakip na ang mga pribado ug publikong tunghaan, commercial ug industrial establishment kinahanglan kining manglimpiyo diha sa ilang palibot, tugkaran, garden, kanal, karsada aron mapuhag ang mga posibleng itlogan sa mga lamok nga nagdala og dengue.
Ang kagawad sa barangay nga si Edwin Enerlan, chairman sa committee on laws maoy nangamahan sa ordinansa. Ubos usab sa ordinansa ang pagdili sa pagpataka og labay sa basura ilabi na diha sa kadalanan, kanal ug sports complex.
Ang mga tag-iya og bakanteng luna ang gi-required usab sa paglimpiyo niini.
Ang makalapas sa ordinansa pabayaron kini og P500 nga multa sa unang higayon, P1,000 sa ikaduhang kalapasan o labaw pa.
Tumong sa opisyal sa barangay nga mamentenar ang kalimpiyo diha sa ilang barangay. (BANAT NEWS)