DTI mi-warning, mo-overprice prisuhon

CEBU, Philippines - Ang Department of Trade and Industry (DTI)7mipasidaan  nga  illegal ang  pagpatong og dagkong kantidad sa mga produkto ug  serbisyo nga gamitan og credit card.

Matud pa ni DTI 7 Regional Executive Director Asteria Caberte nga kadtong migamit sa ilang credit card kinahanglang mobayad lamang sa kantidad nga anaa sa price tag sa baligya.

 Gipasabot ni Caberte nga ang sobra nga  pagpabayad o patong  nga presyo  sa baligya bisan kun kini  giutang usa ka paglapas sa Price Tag Law.

Dugang pa ni Caberte nga ang probisyon sa Price Tag Law ubos sa Republic Act 7394 nagmando sa mga namaligya og mga produktong ginagmay lamang o retail nga gikinahanglang aduna kini tukmang label o  price tag o bisan unsang marka nga motug-an sa mga mamalitay sa tinooray nga presyo sa produktong gibaligya.

Ubos usab sa maong balaod  walay produkto nga ibaligya nga mas mahal pa sa natumbok sa price tag.

Ang maong pasidaan sa DTI gihimo ilabi  na  karon  nga  ting-abli  na sa klase  sa mga  tulunghaan diin kadaghanan sa mga konsumedor mamalit  og mga gamitonon alang sa tunghaan.

Ang  kaapiki  sa  kwarta, makapugos sa  mga  ginikanan pagpangita  og  paagi nga  modangop  nalang  sa  mga  credit  card ug  uban  pang  paagi  sa pangutang.

Mibahad ang DTI  sa mga retailer   nga  mopahimus sa  mga  mangutang  ug  luokon  sa bug-at nga patong  sa presyo  sa ilang  mga  baligyang  produkto pahamtangan    og  multa  nga  P5,000 ug pagkabilanggo gikan sa usa ka buwan ngadto sa unom ka buwan. (BANAT NEWS)