CEBU, Philippines - Higpit nga gipasidan-an sa mga salbador sa katalagman sa lalawigan sa mga kadagkoan sa tulunghaan ug mga lokal nga opisyal sa kagamhanan sa kahilitang mga lugar nga magmabinantayon sa pag-atiman sa mga kabataang nagtungha sa panahon sa katalagman.
Si Neil Sanchez. Chairman sa Provincial Disaster Risk Reduction and Management Council (PDRRMC) mihimo sa maong pasidaan samtang nagkaduol na ang panahon sa tinguwan nga mao usab ang panahon sa tingklase sa mga tulunghaan.
Matud pa ni Sanchez nga sa panahon sa mokusog ang uwan, gibalaod na nga anaa ra sa principal ug kapitan sa barangay ang pagsabot-sabot sa pagsuspenso sa klase sa mga tinun-an. Miingon si Sanchez nga mahinungdanon kaayo ang koordinasyon sa lokal nga mga opisyal sa kagamhanan sa barangay ug sa mga opisyal sa eskuylahan aron nga matuman nila ang ilang katungdanan sa pag-amping sa kinabuhi sa kabataan nga anaa sa eskuylahan.
Matud pa ni Sanchez nga kun masabtan sa mga kadagkoan sa eskuylahan nga mamiligro ang kinabuhi sa mga bata, gumikan sa baha o kaha landslide, kinahanglang dili tugotan niining makapauli sa ilang pinuy-anan ang mga kabataan kung walay mga ginikanan o kaha mga dagko na igsoon niini ang mokuha kanila.
Kini tungod kay matud pa ni Sanchez may mga panghitabo na nga human suspensuha ang klase tungod kay nagdaut ang kahimtang sa panahon gipapauli sa mga magtutudlo ang mga estudyante apan nakasugat kini og baha sa dalan busa nadisgrasya. Gumikan niini si Sanchez miingon nga gihigpitan na karon sa balaod nga kun suspensuhon na sa kadagkoan sa eskuylahan ang klase tungod sa di maayong kahimtang sa panahon, tinuon niini nga una mopauli ang mga bata kinahanglang may tagtungod na niini ang mokuha ug ikauban nila sa pagpauli aron masiguro ang ilang kinabuhi. WC (BANAT NEWS)