CEBU, Philippines - Naugdaw ang usa ka restaurant nga nahimutang sa Sanson Subdivision barangay Lahug, dakbayan sa Sugbu ala-una sa kaadlawon kagahapon.
Matud pa sa tag-iya sa Ocean Garden Seafood Restaurant nga si Frank Dinsay, nakamatikod siyang mibugwak og aso ang panghaw sa ilang restaurant ug nagkanaas diha sa sud hinungdan nga iyaha kining gisusi. Apan diha na siya nakabantay nga sunog kini tungod sa pagpaka sa mga bildo tungod sa kainit diha sa sulod hinungdan nga mitawag siya sa bombero.
“Naa koy nadunggan nga nagbuto-buto unya pagtan-aw nako naka-detect nako’g aso diha sa chimney kay close na gud ta…So far everything was in order namawong man tag ensakto now I’m thinking og unsa gyud,†matud pa ni Dinsay.
Giisa sa kabomberohan ngadto sa 3rd alarm ang maong sunog ug gibanabanang P250 mil ang danyos niini. Si Cebu City Fire Marshal William Tacaldo, miingon nga ginama sa light materials ang maong restaurant hinungdan nga dali ra kini nga gilamon sa kalayo.Ang arson investigators padayon pa sa ilang imbestigasyon sa hinungdan niini. Ang maong restaurant katorse na ka tuig nga nag-operate.
Sa laing bahin, samtang nagkarakara ang kabomberohan sa pagpasirit og tubig sa maong restaurant nagkainitay usab ang hepe sa Lahug Fire Sub-Station nga si SFO3 Clito Pulido ug ang fire volunteer nga si Roy Unabia.
Si Unabia mipasangil nga gisukmag siya ni Pulido samtang siya nagkupot sa nozzle sa fire hose. Matud pa nga nasuko si Pulido nganong nagsuot og fire coat si Unabia nga dunay tatak sa BFP. Apan si Unabia miingon nga maong iyaha kadtong nasuot kini tungod kay nabasa ang iyang fire coat ug di siya makasugakod sa kainit atol sa pagresponde.
“Nagkupot ko sa nozzle kay nag-overhauling mi, miduol man na siya’g kalit nako ang hepe midiretso’g panumbag. Pwede ra man unta ko niya ingnon sa tarong,†padayag pa ni Unabia nga niadtong tungora nagsuot lang og sleeveless.
Gisuwayan sa pagtawag si Tacaldo aron kuhaan sa iyang habig bahin sa insidente apan wala kini motubag sa iyang telepono. (BANAT NEWS)