CEBU, Philippines - Sugod karong Lunes sunod semana, 24 ka kawani sa Cebu City Hall nga nadestino sa City Assessor’s Office tahasan na nga mohimo’g tax mapping sa lainlaing “real properties†dinhi sa dakbayan. Matud ni City Administrator Jose Marie Poblete nga tumong niining maong lakang mao nga molambo ang pagpangolekta sa buhis sa dakbayan sa Sugbo gikan sa mga tag-iya og kayutaan, building ug mga makinarya.
Pinaagi sa mga tax mappers mahibaw-an kun ang mga tag-iya sa real properties nagbayad ba sa tukmang buhis ngadto sa dakbayan.
Si Poblete nagkanayon nga daghan na nga kayutaan nga narehistro lang nga gigamit isip residential ingon man ang mga balay gilista nga usa ka yano nga pinuy-anan apan gigamit na diay kini sa negosyo.
Gipasabot ni Poblete nga gamay ra ang buhis sa mga residential kun itandi sa commercial. Iyang gihimong sanglitanan mao nga adunay mga yuta nga girehestro lang isip residential apan gipatukoran na diay kini og mga negosyo. Sa ingon nga paagi, modaku ang makolekta nga buhis sa dakbayan.
Si City Assessor Eustaquio Cesa miingon nga ang 24 niya ka sakop nga bahinon og duha ka pundok daghang mahumang trabaho sa usa ka adlaw.
Matud ni Poblete nga modoble ang ilang koleksyon sa buhis gikan sa real properties tungod sa pagpatuman sa tax mapping. (BANAT NEWS)