CEBU, Philippines - Patay ang usa ka giingong ‘badlungon’ nga nabilanggo na kaniadto tungod sa kasong pagpangawat ug giingong nahimo na karong drug runner human gipusil sa wala mailhing lalaki atol sa pagbunok sa ulan kagahapon sa kaadlawon diha sa sitio Berpas, V. Rama Avenue , barangay Guadalupe sa dakbayan sa Sugbu.
Ang biktima nailhan nga si Kim Arthur Batal alyas Kimix, 32, molupyo sa maong lugar ug giingong dili pa lang dugay nga nakagawas sa prisohan tungod sa kaso niining pagpangawat.
Ang residente sa maong dapit nga si Danny Mendoza miingon nga sa wala pa mahitabo ang insidente miabot ang biktima ug misagol sa ilang grupo nga nag-inom.
Pipila ka minutos ang milabay mibundak ang kusog nga uwan ug gisundan kini og sipang butobuto sa armas atol sa pagbuwagbuwag sa mga nag-inom.
Sunod nga nakita sa mga tawo ang biktima nga nagbaragbarag sa paglakaw ug kalit nga nahagba sa dalan.
“Nakadungog mi’g buto. Pak! Pak! Pak!, Akong nakita ang motor pero di maklaro..basta wala gyud ko maka-identify kay uwan… unya di gyud siya maklaro kay mura man gud og nag-raincoat. Nya pagpusil ni Kimix, tingala mi kay nagbarag-barag siya ba nga naglakaw mao nato nahagba na siya,†pasabot pa ni Mendoza.
Ang amahan sa biktima nga si Kim, igo na lang sa pagsud-ong sa iyang anak ug nakaingon “Wa na man tay mahimo bisan unsaon namatay na man na.â€
Gikompirmar usab sa amahan nga dili pa lang dugay nga nakagawas sa prisohan ang iyang anak. Wala na siya mohatag pa dugang pang mga detalye bahin niini.
Ang kapolisan sa Homicide Section, nga mirespondi sa dapit uban sa Crime Scene Investigation nakarekober ug lima ka kabhang sa calibre .45.
Matud pa ni PO1 Michael Angelo Singson sa Homicide Section sa Cebu City Police Office nga sa ilang nakuhang inisyal nga impormasyon bahin sa biktima nga bag-ohay pa nakagawas gikan sa prisohan tungod sa kasong pagpangawat si Batal.
Dugang pa ni Singson nga usa ka drug runner si Batal hinungdan nga ila pang gisusi karun kun ang pagpamusil aduna bay kalambigitan sa ilegal nga drugas.
Gisalikway usab sa kapolisan ang pagdudang vigilante ang mitira kang Batal kinsa nakaangkon og samad pinusilan sa likod ug sa dughan nga gituohang gitiwasan. (BANAT NEWS)