TCPS mo-adopt og usa ka klase sa mga tinun-an
CEBU, Philippines - Kapolisan sa dakbayan sa Talisay mag-adopt-a-class sa pagbukas sa klase karong Lunes matud ni Superintendent Elmer Lim, officer-in-charge sa Talisay City Police Station.
Si Lim nga nahinabi sa Banat News mibutyag nga nagpili sila og usa ka section diha sa Linao Elementary School nga maoy hatagan nila og mga school supplies karong pagbukas sa klase.
Gawas niini mohatag usab sila og mga foot pot nga malatayan sa mga bata panahon sa ting-uwan aron dili sila magkalapok.
Matud ni Lim nga ang maong kalihukan kabahin gihapon sa programa sa Philippine National Police nga mohatag og tabang ngadto sa mga tunghaan ug estudyante.
Sa laing bahin, ang kapolisan sa siyudad andam na kini sa pagbukas sa klase karong Lunes.
Matud ni Lim nga dunay ibutang nga mga polis diha sa mga dagkung eskwelahan sa Talisay diin lakip sa maong mga dagkung eskwelahan mao ang Talisay City Central School, Tabunok Elementary School, Cansojong Elementary School, Lawaan Elementary School ug Lagtang Elementary School.
Siya nanawagan sa mga ginikanan nga dili pasagdan ang ilang mga anak ilabi na kadtong mga bata nga motungha sa kindergarten ug Grade one tungod kay kinahanglan pa silang bantayan sa pagsugod og eskwela.
Ang mga tagdumala sa tunghaan gipanawagan usab ni Lim nga mohimo og kaugalingong security set-up alang sa ilang seguridad.
Si Lim midugang nga makig-ayuda sila sa City of Talisay-Traffic Operation Development Authority (CT-TODA) sa pagbukas sa klase diin ang CT-TODA mao kini magmando sa trapiko sa kadalanan. Gilauman nga sa pagbukas sa klase maghuot ang trapiko diha sa kadalanan. (BANAT NEWS)
- Latest
