BACOLOD CITY, Philippines – Usa ka sakop sa Civilian Armed Forces Geographical Unit (CAFGU) ang gipasanginlang namusil sa usa ka sibilyan sa lungsod sa Murcia, Negros Occidental niadtong Lunes. Giila ang maong CAFGU member nga mao si Ronald Taghoy, 26, armado og M-14 assault rifle dihang giingong iyang gipusil si Romeo Lastimoso, 42, sa tuong bukton ug dughan atol sa kagubot sa usa ka diskoral sa barangay Pandanon Silos atol sa pista.
Wala na mopakita pa si Taghoy human sa hitabo.
Gibutyag ni Colonel Jon Aying, 303rd Infantry Brigade commander, nga dunay gipadalang mga CAFGU gikan sa tulo ka mga detachments sa maong barangay aron motabang sa pagpangita kang Taghoy. Hinuon gipahibalo ni Aying nga nabalik na kanila ang armas ni Taghoy apan wala pa nila matino kun giunsa pagka-recover ang maong armas.
Nasuta sa imbestigasyon nga dunay kagubot nga nahitabo sa maong diskoral ug si Taghoy usa sa mga miresponde aron pakgangon ang mga nag-away apan giingong adunay mihapos og botelya ug mibukbok sa luyo sa maong militiaman hinungdan sa kapungot niini.
Matud pa nga miuli si Taghoy sa ilang detachment ug gikuha ang iyang M-14 rifle ug mibalik sa diskoral ug gikalalis na hinuon si Lastimoso kinsa giingong hubog niadtong tungora nga miresulta sa pagpamusil. (BANAT NEWS)