Gabii sa kabilin, Mactan Shrine ug Birhen sa Regla nalakip sa bisitahon

CEBU, Philippines - Maapil sa rota sa gipaabot nga Gabii sa Kabilin  “museum tours” dinhi sa Sugbo ang siyudad sa Lapulapu nga gikatakda sa  Mayo 31 niining tuiga.

Si City Tourism Officer Hembler Mendoza sa iyang pamahayag sa press conference miingon nga lakip sa rota nga bisitahon unya sa mga langyaw ug lokal nga turista mao ang Mactan Shrine ug Nuestra Virgin dela Regla National Shrine nga nahimutang sa barangay Poblacion sa maong dakbayan.

Ang Gabii sa Kabilin kabahin sa tinuig nga kasaulogan sa nasud sa National Heritage Month ug International Day of Museums nga pagahimoon sa matag katapusang Biyernes sa bulan sa Mayo.

Kini gipasiugdahan dinhi sa Sugbu sa Ramon Aboitiz Foundation Inc. nga unang gisugdan niadtong tuig 2007.

“It’s high time for Lapulapu to join and showcase its heritage sites,” nagkanayon si Mendoza sa iyang pamahayag.

Karong nalakip ang Lapulapu City sa Gabii sa Kabilin makahigayon na ang siyudad sa pagpakita ngadto sa mga bisita sa ilang mga bag-o nga tourism projects sama sa Old Opon Walk Tour ug Olango My Gateway nga wala pa kaayo maila.

Ang Old Opon Walk Tour sa dakbayan mao ang mga dapit nga giisip nga labing makasaysayanong mga lugar nga nagsilbing kabilin gikan pa sa katigulangang Oponganon.

Kini  mao ang Muelle Osmeña sa barangay Poblacion, Nuestra Virgin dela Regla National Shrine ug duol  niini nahimutang usab ang karaang plaza sa dakbayan.

Ang maong kalihokan nga magsugod sa alas 6 ang takna sa gabii ug matapos kini hangtod sa tungang gabii nga naglakip sa pagpakita sa mga produkto nga ginama sa mga lumad nga Oponganon. (BANAT NEWS)