Kasiyam nanglugos nadakpan

CEBU, Philippines - Usa ka lalaki nga adunay siyam ka kasong pagpanglugos ang nadakpan diha sa Sitio Soong Brgy. Mactan dakbayan sa Lapulapu sa milabay’ng hapon.

Ang suspek mao si Edgar Paduga, residente sa maong dapit kinsa gireklamo sa usa ka 20-anyos nga babaye nga giingong gibalik-balikan niya og lugos sa milabay’ng tuig.

Matud pa ni SPO4 Boy Ngujo sa Warrant Section sa kapolisan sa Lapulapu nga nakadawat siya og impormasyon nga si Paduga miduaw sa ilang panimalay sa Brgy. Mactan hinungdan nga iyang gidala ang Warrant of Arrest nga giluwatan ni Lapulapu City RTC branch 59 Hon. Judge Anna Marie Militante sa kasong siyam ka hugna nga pagpanglugos (9 counts of rape).

Buot untang moeskapo si Paduga apan nakuptan kini ni Ngujo ug gidala sa buhatan sa kapolisan. Sa dihang gikuhaan sa iyang habig si Paduga nagdumili kini sa pagtubag.

Ang biktima giingong wala dayon makasumbong sa gibuhat kaniya tungod sa kahadlok sa pagpanghulga niini maong nanganad ug gikanunayan sa suspek ang paglugos kaniya.

Apan nadiskobrehan gihapon ang gihimo ni Paduga ngadto sa dalaga maong kini milayas sa maong dapit. (Bong Soriano/EIM) (BANAT BALITA)