9-anyos gi-hostage sa tawong nagmaoy

CEBU, Philippines - Usa ka 9-anyos nga batang babayi ang gi-hostage sa iyang silingan pasado alas- 8 sa miaging gabii diha sa sitio Missionaries, dalan Santo Niño barangay Suba dakbayan sa Sugbo.

Ang 9-anyos nga bata kansang pangalan gipugngan sa Banat News giingong gi-hostage ni Polinario Nanoy, kinsa giingong nagmaoy ug migamit og kutsilyo ug tinidor ug mihulgang patyon ang bata.

Si Nanoy gikuninitan sa mga tawo ug nalandig sa tambalanan human sa hitabo.

Ang tanod sa maong barangay nga si Armando Cabugason miingon nga naalarma sila nianang gabhiuna human sila makadawat og report nga nagmaoy si Nanoy diha sa ilang dapit.

Dihang naabot ang mga tanod mikaratil kini sa pagdagan palayo ug naagian ang biktima nga iya dayong gipunit ug gitionan og kahoy.

Ang silingan sa bata nga silang Edgardo Tortor ug Jimmy Torrefil ang gikatahong maisugon kaayong mihamag kang Nanoy.

Wala nay nahimo ang suspek dihang gitabangan og kupot sa duha ug nadisarmahan sa iyang gikuptang kutsilyo.

Sa kapungot sa mga tawo gikuninitan og kulata ang suspek nga miresulta sa iyang pagkabun-og ug nalandig sa tambalanan.

Si Tortor nakaangkon usab og samad sa tuong bahin sa iyang kamot human maigo sa kutsilyo. Giandam na sa kapolisan ang kasong ipasaka batok kang Nanoy. (Lesley Caminade-Vestil/EIM)