CEBU, Philippines - Giklaro ni Vice-Governor-Elect Agnes Magaple dili matawag nga special treatment ang paghatag og siguridad sa kontrobersyal nga anak ni Talisay City Mayor Socrates Fernandez nga si Joavan diha sa Cebu Provincial Detention and Rehabilitation Center.
Si Magpale miangkong siya mismo mitawag kang CPDRC Jail Warden Romeo Manansala sa miaging adlaw nga sigurohong dili mapasipad-an si Joavan sa mga inmates. Matud ni Magpale nabasahan niya sa mga pamantalaan nga gibiay-biayan si Joavan sa mga inmates ug duna pay mibahad kaniya.
Sumala pa ni Magpale tawo ra usab si Joavan ug iyahang kabubut-on ang pagtawag kang Manansala aron sigurohon ang seguridad sa anak sa mayor kinsa gideklarar sa kapolisan nga Public Enemy No. 1.
Giklaro niyang walay kalabotan ang amahan ni Joavan nga si Mayor Fernandez ug Kongresista Eduardo Gullas sa iyang gihimo. Buot lamang ni Magpale nga segurohong gibantayan si Joavan dili lang tungod sa iyang seguridad kundili aron dili na usab kini makabuhi pa og balik. Sa laing bahin, ang Deputy Ombudsman sa Central Visayas nga si Pelagio Apostol mibutyag nga naghimo na sila karun sa case building kung si kinsa ang responsable sa pagpagamit sa sakyanan sa siyudad sa Talisay sa pag-ikyas ni Joavan.
Buot sutaon sa Ombudsman kung kinsa angayang manubag sa nahitabo tungod kay base sa mga report sa mga balita sa Mayor’s Office nadestino ang duha ka sakyanang gilambigit atol sa pag-eskapo sa anak sa mayor.
Ang maong sakyanan narekober diha na sa usa ka fastfood chain sa dalan Banilad sa dakbayan sa Mandaue apan giabandonar na kini. Subay sa balaod dili basta magamit ang mga sakyanan sa gobiyerno kung wala kini trip tickets ug kung dili opisyal nga lakaw sa mga kawani sa gobiyerno. (Kristianne Marie Alcaria, CNU Intern/EIM) (BANAT BALITA)