VM Young kutob lang karong adlawa isip acting mayor

CEBU, Philippines - Kutob na lang karong adlawa ang paglingkod isip acting city mayor ni Vice Mayor Joy Young subay sa memorandum nga gipadala sa buhatan sa mayor ngadto kaniya.

Si Young gimanduan ni Mayor Michael Rama nga paglingkuron isip temporaryong mayor samtang nagbakasyon pa si Rama sulod sa 22 ka adlaw.

Apan subay sa unod sa memorandum sugod lang sa adlaw nga Lunes Mayo 20  hangtud sa Mayo 24 ang pagpalingkod kaniya isip acting mayor.

Si Young nagkanayon nga wala na kinahanglana pa ang mga pormal nga suwat alang pagpahibaw kaniya nga mao kini ang molingkod ug magpatuman sa mga trabaho sa usa ka mayor.

Apan giklaro niyang bisan walay memo awtomatiko siyang molingkod hangtud sa pagbalik sa mayor. Matud ni Young nga giingnan siya gikan sa buhatan sa mayor nga padal-an ra siya og lain na sab nga memo alang sa mga mosunod nga semana.

Nagduda karon si Young nganong giputol-putol kini pagpadala sa buhatan sa mayor. Nagtuo si Young nga nabalaka si Rama nga basin duna siya’y buhatong supak sa kabubut-on  sa mayor. Apan, giklaro ni Young nga wala siya’y buhaton nga makadaot ug makabalda sa mga proyekto alang sa dakbayan. (Jessa Celocia,CNU Intern/EIM) (BANAT BALITA)