CEBU, Philippines - Andam na ang tanan alang sa hapsay nga pagbukas sa klase karong Hunyo 3 ug usa sa nakatampo og dako sa hingpit nga pagkaandam ning tanan mao ang Brigada Eskwela, matud pa ni Regional Director Carmelita T. Dulangon sa Department of Education (DepEd) 7 kagahapon.
Sa tulumanong Kapihan sa PIA nga gipahigayon sa opisina ni Dulangon didto sa regional office sa DepEd 7 sa Ecotech center sa barangay Lahug, ning dakbayan sa Sugbo nga gipalanog sa DYMR Radyo ng Bayan Cebu, gipasalig usab ni Dulangon nga wala nay magklase sa ilawom sa kahoy karong Hunyo.
Matud pa ni Dulangon nga kining tanan naggumikan sa paningkamot sa DepEd nga masulbad na ang suliran bahin sa lawak klasehanan ug mga lingkoranan.
Samtang sa bahin sa Brigada Eskwela, gihangop kaayo ni Dulangon ang hingpit nga kooperasyon sa lokal nga kagamhanan sa matag barangay, lungsod ug dakbayan sa tibuok rehiyon.
Kini tungod kay nasuta ni Dulangon base sa mga report nga iyang nadawat gikan sa mga division superintendent sa tibuok rehiyon ang kadasig nga gipakita sa mga kapitan sa barangay uban sa ilang mga konsehal sa pag-abag sa mga gimbuhaton nga pagpangayo sa mga gubaong bahin sa mga tulunghaan sa ilang tagsatagsa ka dapit nga nahimutangan.
Miingon si Dulangon nga ang Brigada Eskwela nga gipatuman sa kagamhanan nga gisugdan niadtong Lunes, ug matapos karong Biyernes naghatag og kadasig sa mga ginikanan, mga magtutudlo uban sa mga tinun-an kinsa nag-iyahay pagtampo sa ilang kusog aron maayo ang mga guba sa matag lawak klasehanan sa matag eskuylahan.
Nahimo usab nga dapit sa kalipay ang matag tulunghaan diin ang tanang misalmot sa mga gimbuhaton nahisama sa usa ka pamilya nga nag-iyahay sa pagtrabaho apan nag-usa sa pagpangaon, matud pa ni Dulangon.
Midugang si Dulangon nga nagkalainlain ang mga gimbuhaton sa mga misalmot sa Brigada Eskwela kay ang mga lalaki maoy mitrabaho sa bug-at nga trabaho sama sa pag-ilis og mga atop sa mga buslot ug guba na nga atop, may namintal, may nag-ayo sa mga lingkoranan, pansayan, samtang ang mga babaye mao usab ang nanilhig sa palibot ug nanglimpyo sa matag lawak, samtang ang uban maoy naghikay og pagkaon.
Sa laktud matud pa ni Dulangon nga ang tanan gihimo aron hingpit na nga maandam ang pagbukas sa klase diin ang mga tinun-an igo na lang sa pagtambong sa klase samtang ang magtutudlo deretso na sa paghan-ay sa iyang igtutudlo gikan sa unang adlaw sa klase hangtud sa pagkatapos sa tuig tingtungha. (BANAT NEWS)