CEBU, Philippines - Usa ka bata ang patay, ug tulo usab ang naangol dihang gidaro sa usa ka Ceres Bus ang karenderya diin nangaon ang mga biktima duol sa terminal sa National Highway sa Brgy. Talisay sa lungsod sa Santander pasado alas-8 sa gabii niadtong Sabado.
Ang biktima giila nga si Samantha Claire Devibar, 3, uban silang Roderick Jugo ug Catherine Devibar, paryente sa biktima lakip na ang tag-iya sa karenderya nga si Elizabeth Cavalida.
Sa imbestigasyon sa kapolisan sa Santander nga gipangunahan nilang PO2 Anthony Aba, ang konduktor nga si Gedeon Pantuan Novilla, 28, mibutyag nga padulong na silang mo-parking sa terminal dihang nalahos sila sa maong kan-anan.
Ang drayber sa bus nga si Jaque Siege Duarte, daling miikyas human sa aksidente. Ang mga nasamdan gidala sa Oslob District Hospital ug didto nakabsan sa kinabuhi ang bata, samtang ang mga ginikanan niini gibalhin sa tambalanan sa Sugbo, ug ang tag-iya sa karenderya gidala sa Malabuyoc Hospital. Samtang patay usab ang usa ka pito ka buwang mabdos ug duha ang samaran lakip na ang 8- anyos nga bata dihang giharos sila sa usa ka multicab nga gimaneho sa barangay kapitan sa Guibuangan sa lungsod sa Barili diha sa National Highway sa Barangay Mantalongon, Barili pasado ala 1:00 sa hapon kagahapon.
Ang namatay giila nga si Line Navarro, 35, pito ka buwan nga mabdos, taga Barangay Bugtong Kawayan samtang nangaangol ang pag-umangkon niini nga si Eva Mae Salazar, 8, ug Joemar Bertudlo, 24.
Mitahan hinuon sa Carcar City Police Station ang nakadasmag kanilang si Guibuangan barangay captain Nelson Gingoyon.
Sa imbestigasyon ni PO1 Florentino Cuadero si Gingoyon gikan sa syudad sa Carcar ug paingon na pauli dihang giingong nakatulog kini samtang nagmaneho sa iyang multicab ug mitipas sa pikas kalsada ug giharos ang mga biktima nga gikan nanimba.Si Salazar ug Bertudlo daling gidala sa Barili District Hospital samtang si Gingoyon misakay og laing sakyanan ug milahos sa Carcar Police Station ug gi-turnover na og balik ngadto sa Barili Police. (BANAT NEWS)