Samtang 44 ka dugang posisyon ang kabuksan niini

CEBU, Philippines - May 44 ka posisyon sa lokal nga   pangagamhanan  nga  tukoron   kung mahinayon  ang  laraw  sa paghimo  og  probinsiya sa Mactan.  Matud  pa  ni Congresswoman elect   Radaza   nga  ang dakbayan sa Lapulapu nga karon usa  ka “lone district” mobalik   sa  pagka- component city. Ang  mabuksan  usab  nga  posisyon  sa mga lokal nga kagamhanan niini,   mao  ang  usa ka gobernador, bise gobernador, 8 ka bokal, 3 ka mayor, 3 ka bise mayor, 26 ka konsehales ug duha ka kongresista.       

Samtang  ang kampo ni Lapulapu City Mayor Paz Radaza mikatawa lamang sa pamahayag sa pilderong kandidato sa LP pagka  mayor nga si Efrain Pelaez,  sa  gisulti  niini nga ukopahon sa pamilyang Radaza ang mga posisyon sa maong lokal nga kagamhanan niini kung mahinayon ang katukoran sa maong probinsiya sa Mactan.         

Gitubag  kini  ni Jonjie Gonzales ang tigpamaba sa kampo ni Radaza nga tulo lamang   ang  anak sa pamilya ni Mayor Radaza ug   bisan  pa  kun  iapil si Kon. Harry “Don” Radaza dili pa  gihapon   kini makaukopar sa tanang pwesto sa probinsiya sa Mactan.  Busa gihagit sa kampo ni Radaza nga padaganon si Pelaez sa mga mabakante  unyang  posisyon aron kahatagan kini og higayon sa iyang tinguha sa pagserbisyo sa katawhan kung kini botohan sa mga Oponganon.

Ang dakbayan sa Lapulapu adunay P1.5 bilyones  nga gahin matag tuig ug  ang P600 milyones niini adto  paingon   sa ilang “general fund ”nga  alang sa mga proyekto nga  sama sa edukasyon, samtang ang nahibiling 45% niini, alang   sa suholan sa  mga  kawani  sa kagamhanan ug uban pang mga nag-unang panginahanglan sa serbisyo sa mga Oponganons.  Matud pa ni Radaza nga  mosamot na  unya   kadako ang kita sa mga lokal nga kagamhanan  kun matukod  na  ang probinsya sa Mactan gumikan sa Internal Revenue Allotment  (IRA) niini. (BANAT NEWS)