Bata’ng gihilog gilabay sa atabay

CEBU, Philippines - Usa ka bata nga  bag-ong   gihilog  gisulod  og  plastic   ug  gilabay  sa atabay   didto  sa barangay Malolos sa lungsod sa Barili   sa miaging Sabado  sa hapon.

Si  Caridad Binggaan, 53, minyo,  nga  nagpuyo sa maong lugar  maoy  unang  nakadiskobri sa  plastic  nga  naglutaw-lutaw  sa tubig  sa maong  atabay.

Kini  dihang  nagsag-ob  siya  og  tubig  gikan  sa maong  atabay   aron  ipainom  sa  iyang  baka.

Sumala  ni  Binggaan  nga iya  kining  gipunit  sa pagtuo  nga  napalid  lang  sa hangin  ug  mitugpa  sa sulod  sa atabay  dihang  sa pagsil-ing  niya,  iyang  nasuta  nga  bata  diay  ang  sulod  niini. Si PO2 Richard Cababat sa Barili Police  Station  kinsa  nakadawat  sa maong  taho mibutyag  sa Banat News  nga  ila  dayon  kining giimbistigar  ug  nasuta  nila  nga  nag-anam na  kadugta  ang  bata  busa  wala  na  nila  masusi  kun lalaki  o  babaye  ba  kini.

Ang  gihilog  nga bata  giatiman  dayon sa mga opisyal sa  barangay  ug gipahiluna kini sa lubnganan samtang ang kapolisan padayon pa sa ilang pagpaniid kinsay  inahan  sa  maong  bata aron manubag  kini  sa iyang  gibuhat  sa iyang  anak. (BANAT NEWS)