CEBU, Philippines - Dili na buot sa kadagkoan sa Police Regional Office (PRO) 6 nga pabalikon ang mga non-PNP offices sa sud sa Camp Delgado human sa pag-ulbo sa kampo nga mimugna og dakong sunog ug miguba sa mga buhatan sa sud sa maong police headquarters usa ka semana na ang nakalabay.
Si Chief Supt. Agrimero Cruz, Jr., PRO6 director, miingon nga mihimo na sila og proposal ngadto sa mga military units nga dunay mga opisina sa Camp Delgado nga dili na sila pabalikon didto sa maong kampo.
“We would ask them to relocate kasi malalaki naman ang mga military camps and we are cramping on this 6-hectare area,†matud pang Cruz.
Diha sa maong kampo gibutang ang opisina sa Regional Unified Command panahon pa sa pamunoang Marcos. Matud pang Cruz nga kinahanglang ang mga military offices adto ibutang sa layo sa kabalayan ilabi na ang Explosive Ordnance Division sa AFP ug kinahanglang hipuson sa mas luwas nga mga lugar ang mga ordnance o mga bomba.
Si Army chief Lt. Gen. Noel Coballes misusi na sa naugdaw nga Explosive Ordnance Division (EOD) sa Army Support Command (ASCom) nga diin giingong miulbo ang bomba ug mimugna og sunog sa tibuok kampo niadtong Miyerkules.
Gawas sa mga military offices, diha usab nag-opisina ang Office of Civil Defense (OCD) 6.
Minilyong kantidad sa mga armas, police equipment, musical instruments ug office equipment sa mga opisina lakip na ang mga personal nga mga gamit sa kapolisan ang naugdaw. (Jennifer P. Rendon/EIM)
Supporters sa Iloilo mayoralty bets nagpinusilay
Duha ka mga supporters sa managkaribal nga mayoralty bets sa Leganes , Iloilo ang nagpinusilay ug parehong nangalandig sa tambalanan.
Ang nagpinusilay giila sa kapolisan nga mao sila si Honorio Cabrera, 43, ug Tito Castaño, 65. Si Cabrera naigo sa tiyan samtang si Castaño naigo sa duha ka mga paa.
Sumala pa sa imbestigador sa Leganes police nga si PO1 Leo Barnuevo, dugay nang may panagbikil ang duha ug misamot kini tungod kay pareho ang duha nga lunod-patay pagsuporta sa nagkaatbang nga mayoralty candidates sa ilang lungsod.
Matud pa nga si Cabrera iladong supporter ni incumbent Mayor Ike Rojas kinsa napildi ning bag-ohay lang natapos sa piniliay batok kang kanhi Mayor Adolf Jaen, nga mao say gisuportahan ni Castaño.
Base sa imbestigasyon nga si Castaño misumbong sa kapolisan kay gipusil ang ilang balay ug gipasanginlan niini si Cabrera. Usa ka slug sa bala ang narekober diha sa balay.
Apan human mahibaw-i ni Cabrera nga siyay gipasanginlan sa silingan gisulong niya si Castaño ug nagbitbit og kalibre 45 pistola .
Matud pa nga pag-abot sa duha giingong gitionan ni Cabrera sa iyang pistola si Castaño apan natapi niya kini apan nabuthan ang iyang paa. Bisan naigo sa duha ka paa napusilan gihapon ni Castaño sa iyang 12-gauge shotgun si Cabrera.
Nagpaabot pa ang kapolisan sa mga kinihaay sa duha.(/EIM) (BANAT NEWS)