Vendor nga dagha’g stall sa Taboan imbistigahon
CEBU, Philippines - Ang kapitan sa Barangay San Nicolas-Proper ingon man ang iyang asawa ug laing negosyante nga nag-ukopar og daghang tindahan sa Taboan Public Market (TBM) gitakdang ipatawag sa kadagkoan sa City Hall. Si Market Administrator Raquel Arce miingon nga imbitahon nila sa City Hall ang magtiayong Abraham ug Mely Desamparado ingon man si Maritess Mercado aron pasabton sa tinguha sa dakbayan.
Ang magtiayong Desamparado nag-ukopar og lima ka tindahan sa TBM samtang lima usab ang kang Mercado bisan og ang lagda, usa ra gayud unta ang ipa-ukopar sa matag tindera.
Wala masayud si Arce ngano nga sila si Desamparado ug Mercado naka-ukopar man og daghang “stall†ingon man kun kanus-a magsugod ang ilang pagpangabuso. Sila si Desamparado ug Mercado midangop unta sa hukmanan aron pugngan ang tinguha sa dakbayan nga pagguba sa mga “modules†kun tindahan sa Taboan, ilabi na ang ilang giukopar, apan gibasura sa hukmanan ang ilang awhag.
Matud ni Arce nga si Mayor Michael Rama mihatag kaniya og kamandoan nga sa katapusang higayon ipatawag sila si Desamparado ug Mercado aron pasabton nga ang tinguha sa City Hall mao ra gayud ang pagpalambo sa merkado.
Ang dakbayan sa Sugbo nakapahimo na og bag-o nga “modules†kun mga tindahan nga naglibot sa Taboan Market human gub-a ang mga daan nga tindahan. (/WC) (BANAT NEWS)
- Latest
