CCTV operator sa mall nakuhaan na og statement sa NBI
CEBU, Philippines - Nakuhaan na sa National Bureau of Investigation (NBI)-7 og pamahayag si Jeffrey Aquino, kanhi CCTV officer sa Metro-Gaisano Colon may labot sa kamatayon ni Mario Alfie Ducayag nga gipasanginlang nanguha og baligya apan wa mobayad.
Si Ducayag nga taga Naga City namatay samtang gikostudiya sa mga gwardiya sa maong department store niadtong April 12, 2013.
Si NBI Regional Director Antonio Pagatpat nagkanayon nga si Aquino miabot sa ilang buhatan kuyog sa iyang abogado nga si Salvador Solima. Matud niya gikuhaan og pamahayag si Aquino sa ilang investigator on case nga si lawyer Bernard dela Cruz.
Wala hinuon mobutyag si Pagatpat kung unsay gibutyag ni Aquino tungod kay dili pa kini official tungod kay wala pa mapirmahi ni Aquino ug Solima tungod kay milakaw ang abogado niini ug dili buot mopirma si Aquino nga wala iyang abogado.
Susihon pa sa NBI ang pamahayag ni Aquino kung motakdo ba kini sa ilang makuhang mga impormasyon.
Matud pa ni Pagatpat nga niadtong Martes si Thelma Chong sa Crusade Against Violence uban ang pamilyang Ducayag miawhag sa ilang buhatan nga mahatagan og hustisya si Mario Alfie.
Si Fe Shantylle Ducayag, igsuon sa namatay sa pakighinabi sa Banat News sa telepono mipadayag nga dako ang ilang pagsalig sa NBI nga makab-ot ang hustisyang ilang gipangayo. (BANAT NEWS)
- Latest
