Samsam andam motabang sa Talisay

CEBU, Philippines - Misaad  ang  bag-ong  napili  nga  kongresista  sa unang  distrito  sa lalawigan  sa Sugbo  Samsam Gullas  nga  andam  siyang  motabang   sa dakbayan  sa Talisay  luyo  sa kapildihan  pagka-mayor  sa iyang  apohan  nga  si Kongresista  Eduardo  Gullas.

Matud ni Samsam nga   pagbuot  sa  katawhan  sa Talisay  ang  tanan, tungod  niini  mahimo  na  niyang  lig-on  kaayong  kaabag  sa  iyang  pangatungdanan  ang  iyang  apohan kay  himoon  niya  kining  chief of staff  sa iyang  buhatan sa kongreso  busa  giisip  niyang  “blessing  in  disguise”  ang tanan.

Matud  ni  Samsam  nga  gawas  nga  hingpit  kining  makatabang  sa iyang  mga  gimbuhaton  sa kongreso, maka-konsentrar  usab  ang  iyang  apohan  nga  si Eddigul  sa    pagdumala  niini sa University  of  the  Visayas (UV).

Kahinumdoman nga  si Kongresista Eddigul  nagpapiling mayor sa dakbayan sa Talisay   apan napildi kini sa iyang kaatbang nga si Johnny Delos Reyes niadtong milabay’ng eleksiyon.

Si Samsam nga nahinabi sa Banat News kagahapon nagkanayon kini nga mohatag siya og suporta sa bag-ong lider sa Talisay ug sa mga lider sa kabarangayan sa siyudad.

Gawas niini matud usab ni Samsam nga padayonon niya ang nasugdang proyekto sa iyang apohan  sa unang distrito sama sa pagpauswag sa edukasyon, inprastraktura ilabi na sa pagpalapad sa kadalanan, pagpataud og mga linya sa kuryente sa mga sitio ug suplay sa tubig. (BANAT NEWS)