Tomas ug Rama sayong mibotar sa Guadalupe

CEBU, Philippines - Sayong mibotar ang manag-atbang nga kandidato alang sa pagka-mayor sa dakbayan sa Sugbu nga sila si reelectionist Cebu City Mayor Michael Rama ug Cong. Tomas Osmeña.

Alas 7:34 pa lang sa buntag, milinya na si Rama uban ang iyang kanhi asawa Araceli Francisco ug ilang ikaduhang anak nga si Mikel Rama, naabtan pa og duha ka oras sila si Rama tungod sa kataas sa linya una pa sila nahuman pagbotar sa clustered precinct sa Guadalupe Elementary School.

Pagka alas 8:03, miabot sad sa susamang eskuylahan ang iyang kaatbang nga si Cebu City South District Congressman Tomas Osmeña ug midiretso sa iyang presinto sa sudlonong bahin sa eskuylahan.

Si Osmeña, uban sa iyang asawa nga si Konsehal Margot Osmeña ug igsuong Minnie Osmeña milinya sa senior citizen priority lane sa room 18 diin naghuwat sila og usa ka oras kapin sa wala pa hingpit nga makabotar. “It is better now (compared with 2010 elections). It’s a little bit easier now. We had longer lines before,” matud sa kongresista.

Apan si Rama miingon nga angayang usbon sa COMELEC ang sistema sa pag-ipon o clustering sa mga presinto.

Si Cebu City South District Election Officer Ferdinand Gujilde miuyon sa sugyot ug obserbasyon ni Rama.

“Yes, I agree. Because this is also our recommendation but we do not have enough machines. There are only 80,000 PCOS machines around the country,” ang opisyal namahayag.

Ang dakbayan sa Sugbo gihatagan sa COMELEC central office og 592 PCOS machines diin di molapas sa 50 ang nakasugat og problema sa adlaw sa piniliay, si Gujilde midugang. (Jessa Chrisna Marie Agua/EIM) (BANAT BALITA)