Napiskan sa bala kamot nasamad

CEBU, Philippines - Samdan  sa kamot  ang  usa  ka  lalaki  human  maigo  sa usa  ka saag  nga  bala gikan  sa armadong  mga  tawo didto  sa sitio  Lower Matin-aw ,barangay  Tongo,  lungsod  sa San Fernando  niadtong Domingo  sa gabii. Ang  biktima  giila  sa kapolisan  nga  mao  si Ronnie Generalao, 26, molupyo  sa maong  lugar. Sa imbestigasyon sa kapolisan nasuta  nga  adunay unom ka wala hiilhing   mga armadong lalaki   nga nagpabuto  sa ilang  mga armas  didto  sa   Lower Matin-aw, niadtong  Domingo  sa alas 8:00  sa gabii.

Sumala  sa kapolisan  nga  si  Generalao, uban  sa iyang  higala  nga  si  Michael Villariasa nagsakay og motorsiklo ug gipahunong   sa maong  mga  lalaki  dayon  usa  kanila  mipabuto  sa   armas  de fuego niini  paubos  sa yuta  ug  ang  mituasik  nga  bala  nakaigo  sa  walang  kamot  sa biktima.

Dayon  bisan  mikitiw  na  sa  kasakit  ug nagkadugo  ang  maong kamot    gimandaran  pa  kini  pagpaisa  sa   ilang  mga  T-shirt  ug  gisuta  kun wala  ba  silay  dala  nga  armas.

Gituohan  sa kapolisan  nga  ang  maong  grupo  mao  usab  kadtong  gikataho  sa  mga  molupyo  sa  bukirang  barangay  sa San Fernando  nga  nangrakrak  kuno  og  kabalayan  apan  wala  na  kini  hiabti  sa kapolisan  nga  mitubag  sa maong  alarma  niadtong  Sabado  sa gabii. (/WC) (BANAT NEWS)