Miss Mandaue 2013 gikoronahan
CEBU, Philippines - Ang 18-anyos nga tinun-an sa turismo maoy gikoronahan isip Miss Mandaue 2013 gikan sa 11 ka kandidata sa maong indigay sa kaanyag nga gipahigayon sa miaging gabii sa Heritage Plaza sa atubangan sa city hall.
Si Miss Steffi Rose Aberasturi nauyonan sa mga tawo dihang mipaso kini sa entablado, busa napili kini nga best in costume, best in fun wear ug best in evening gown.
Si Aberasturi nakoronahan na isip Sinulog Festival Queen sa tuig 2011 ug Miss Campus Femme sa tuig 2012.
Samtang si Miss Marie Michelle Puche, 20, nga usa ka gradwado sa hotel and restaurant management mao usab ang nahimong first runner up, ug second runner up usab ang 18 anyos nga nursing student nga si Miss Eva Psyche Patalingjug.
Nahimo usab nga 3rd runner up ang 17-anyos nga anak ni Philippine Basketball Association (PBA) player Darryl Smith nga si Miss Apriel Smith ug gisundan sa medical technology student nga si Miss Mhon Therese Menaling, 19, nga maoy nahimong 4th runner up sa maong indigay sa kaanyag.
Si Aberasturi nga tua na karon magpuyo sa Liloan kasamtangang nagtungha sa University of San Carlos ug manghod kini sa Miss Mandaue 2011 nga si Miss Crystalstar Aberasturi. (BANAT NEWS)
- Latest
