CEBU, Philippines - Gipasidan-an sa Department of Trade and Industry (DTI) pag-usab ang publiko batok sa mga binuang sa internet sa mapahimuslanong mga tawo nga migamit sa mga ngalan nila ni DTI Secretary Gregory Domingo ug Executive Secretary Paquito Ochoa.
Gihimo sa DTI ang pasidaan human kini makadawat na usab og reklamo gikan sa nagkalin-laing buhatan kalabot sa mga grupo ug indibidwal nga migamit sa ngalan sa maong mga opisyal sa gobyerno aron makapangilkil og kwarta.
Sa report nga nadawat ni Domingo, modus sa grupo nga aghaton ang ilang linglahon nga buhatan nga mohatag og pundo nga gamiton alang sa nasudnon ug lokal nga eleksyon sa Mayo 13.
Matud pa sa kalihim, nga hugot nga gidili sa DTI ang bisan unsang pagpang-solicit o pagpangayo og kuwarta nga susama sa maong paagi.
Nanawagan sila sa publiko nga i-report sa ilang buhatan sa DTI direct line, 751-3330 o mahimo usab susihon ang kamatuoran sa promo pinaagi sa www.dtincr.ph ang ingon niining matang sa modus aron mahatagan dayon sa tukmang aksyon.
Matud ni DTI7 Regional Director Asteria Caberte nga gipangandaman sa kagamhanan ang pagsang-at og tukmang kiha sa mga tawong masakpan nga mihimo ning maong binuang. (BANAT NEWS)