CEBU, Philippines - Nasikop sa mga estambay ang usa ka esnatser human mosaliring ang motorsiklo niini didto sa barangay Pagsabungan, dakbayan sa Mandaue kagahapon sa ala 1:00 sa hapon. Ang nadakpan mao si Wilmar Bogansa, 22, apan may kapuyo nga taga Catigbian, Bohol ug nagtrabaho isip driver mechanic sa usa ka kompaniya sa taxi sa barangay Pagsabungan sa maong dakbayan.
Si PO2 Christopher Bongo sa kapolisan sa Presinto 3 sa Mandaue City Police Office (MCPO) nga nagbase sa barangay Basak nga nahinabi sa Banat News miila sa biktima nga mao si Fe Solib, 75, nga nagpuyo sa Sector 6 sa barangay Pagsabungan sa maong dakbayan.
Matud pa ni PO2 Bongo nga gikan pa nga misimba sa Santo Niño sa dakbayan sa Sugbo ang biktima ug sa pagkanaug niini gikan sa giluwanan niining PUJ kalit lang gibunlot sa maong suspetsado ang shoulder bag nga gisambilay niini.
Ang biktima nga nakalitan busa nakasinggit ug nangayo og panabang nga nakapaalarma sa mga estambay sa maong lugar kinsa dihadiha migukod dayon sa suspetsado.
Gumikan sa kalisang nga gigukod na siya, nawad-an kini sa panimbang busa misaliring ang iyang motor ug midusmog sa punoan sa usa ka kahoy daplin sa karsada hinungdan sa pagkatumba niini ug nadakpan sa mga estambay. Gihatud dayon kini ngadto sa buhatan sa kapolisan sa maong lugar diin kini kasamtangang nagtingkagol human mabawi ang bag nga gisudlan sa kuwarta ug mga alahas sa biktima, samtang giandam na ang kaso batok kaniya. (BANAT NEWS)