CEBU, Philippines - Girapido ang pinuy-anan sa usa ka kagawad sa barangay nga supporter ni Bogo City Mayor Celestino “Junie†Martinez didto sa barangay Cayang, Bogo City niadtong Sabado sa alas 10:47 sa gabii, duha ka adlaw sa dili pa ang eleksiyon karong adlawa.
Gawas niini gipamusil usab ang duha ka polis nga nagbantay sa mga PCOS machine nga gibutang didto sa barangay Binabag Elementary School nianang pagka 1:30 sa kaadlawon.
Samtang kagahapon sa mga alas 10:00 sa buntag usa ka Granada usab ang napalgan nga gi-abandonar sa gawas nga bahin sa karaang City Hall sa Bogo City.
Ang pinuy-anan nga unang nabiktima sa straffing incident gipanag-iya ni Samuel Cabalican, 50 , minyo ug kagawad sa maong barangay.
Si SPO4 Rolando Torquedo sa Bogo City Police Station mibutyag sa Banat News nga subay sa pasiunang imbistigasyon, nasayran nga ang biktima kauban sa iyang pamilya nangatulog sa maong higayon dihang gipukaw kini sa mga buto- buto sa armas de fuego.
Samtang paglabay sa pipila ka minutos ilang nakita ang duha ka motorsiklo nga nagdali pagbiya sa maong lugar nga misunod usab ang laing motor nga gisakyan og duha ka wala hiilhing mga tawo.
Wala maklaro sa mga saksi ang mga panagway sa nagsakay sa maong mga motor gumikan sa kangitngit sa palibot sa maong higayon.
Samtang sa pagka 1:30 sa kaadlawon gipamusil usab ang duha ka polis nga nagbantay sa mga PCOS machine didto sa Binabag Elementary School ug maayo nalang kay walay naigo niini.
Matug sa mga nakasaksi nga samtang nagbantay sila si P01 Arsenio Illustrisimo og PO1 Moises Cunanan sa mga PCOS machine nga gamiton sa eleksyon karong adlawa, kalit lang miabot ang duha ka wala hiilhing mga tawo nga nagsakay og motorsiklo.
Unya wala kini manaog sa motor, ug sa wala’y igong hinungdan gipamusil ang m aong mga polis.
Tungod kay wala man makaigo, misirit kini ug mipahilayo sa maong lugar.
Samtang kagahapon sa mga alas 10:00 sa buntag usa ka granada usab ang napalgan nga gi-abandonar sa gawas nga bahin sa karaang City Hall sa maong siyudad.
Ang kapolisan nagtuo nga pagpanghulga ra ang maong pagpangrakrak apan padayon kining gisubay karon sa kapolisan kun may labot ba ang politika ning maong hitabo. (BANAT NEWS)