CEBU, Philippines - Mahinangpon nga gipahibalo ni Kongresista Tomas Osmeña nga 90 porsiyento sa mga kandidato sa Bando Osmeña Pundok-Kauswagan (BOPK) maoy suportahan sa Iglesia Ni Cristo atol sa eleksyon karong Lunes.
Si Osmeña miingon nga usa ka “Ka Edmund†sa Iglesia Ni Kristo ang mipahibalo kanila nga kadaghanan sa mga kandidato sa BOPK maoy botohan sa mga sakop sa ilang relehiyon dinhi sa dakbayan.
Ang mga kandidato sa Team Rama ug BOPK pareho nga miawhag og suporta sa Iglesia Ni Kristo apan matud pa gitan-aw sa kadagkoan sa INC nga ang mga kandidato sa BOPK ang angay’ng suportahan.
Hangtud sa pagsuwat niining maong balita si Rama wala pa mohatag og reaksyon kabahin sa gipahibalo ni Osmeña.
Apan usa ka sakop sa maong pundok nga nagdumala og programa sa radyo miingon nga wala pa sila masayod sa pangangkon ni Osmeña kay karong adlawa pa ipahibalo sa ilang kadagkoan kung kinsa ilang suportahan.
Gikataho nga kadtong mga kandidato nga suportahan sa mga opisyal sa INC adunay dakung posibilidad nga modaug kay ang mga sakop sa Iglesia Ni Kristo motuman gayud sa kamandoan gikan sa ilang ministro. (Rene U. Borromeo/EIM) (BANAT NEWS)