Fisherfolks, drivers misuporta kang eddiegul

CEBU, Philippines - Nagkadaiyang pundok sa mga mananagat ug drivers association nipadayag og suporta ug miendorsar ni Cebu First District Representative Eduardo Gullas sa iyang pagpapili pagkamayor sa Talisay. Dili moubos pito ka mga asosasyon sa mga mananagat sa coastal area sa siyudad ug 16 ka drivers’ association-federations ang mipadangat sa ilang hugot nga suporta kang Gullas ug sa lineup sa Alayon party.

Sa usa ka manifesto, ang mga misuporta kang Gullas mao ang Biasong Fishermen Association, Pundok sa Gagmay’ng Mananagat sa Sawsawan sa San Roque, Cansojong Fisherman Association sa Barangay Cansojong, Poocanong Mananagat sa Talisay sa Barangay Pooc, Dumlog Fishermen Association sa Barangay Dumlog, Tanke Fishermen Association sa barangay Tanke ug ang Sitio Asam Kitang Association sa Barangay Poblacion.

Nipakita usab sa ilang suporta sa pagpapili ni Gullas isip mayor ang nagkadaiyang pederasyon sa mga tricycle drayber.

Si Gullas maoy nagpaluyo sa bill nga maoy hinungdan sa pagka-syudad  sa Talisay niadtong Disyembre 2010. Milansar usab kini ug nidaug pagkamayor niadtong miaging piniliay sa 2011.

Sa pikas bahin, si Gullas misaad nga hingusgan pa niya ang pangampanya ug nagpasalamat sa mga sektor nga misalig kaniya ug sa iyang partido.  (BANAT NEWS)