Linabayay og lapok angay ipahunong

CEBU, Philippines - Si Cebu Archbishop Jose Palma miawhag sa mga politiko nga hunongon na ang paglinabayay og lapok atol sa ilang mga kampanya ug ipakita ang ilang kamaayong laki pinaagi sa ilang plataporma.

Matud pa ni Palma, imbes nga magdinautay sa usa’g-usa, mas maayong ipresentar na lang nila ang ilang mga plano ug programa ngadto sa katawhan.

“Campaign must now be high level in the sense that the programs, ang mga platforms nga maayo maoy ilang isulti atol sa ilang kampanya,” matud pa ni Palma.

Iya pud nga giawhag ang mga botante nga pilion lang ang mga kandidato nga sa ilang tan-aw makaayo gyud sa atong nasud ug sa atong komunidad.

Giampo usab ni Palma nga daghang pro-life candidates nga modaug sa umaabot eleksyon apan iyang giklaro nga kung unsa may desisyon sa katawhan iyaha kining tahuron.

Giawhag pud ni Palma ang mga botante nga dili ibaligya ilang boto ug ang mga politiko usab dili mamalit og boto. (BANAT NEWS)