CEBU, Philippines - Usa ka 2-anyos nga bata nahiloan patay niadtong Sabado human niini aksidenteng nainom ang kerosene gas diha sa balay sa uyab-uyab sa inahan niini diha sa Arellano Blvd. sa Brgy. San Roque, ning dakbayan sa Sugbo.
Ang bata giila nga si Jenisse Doble. Gibasol ni Virginia Doble, 59, apohan sa bata ang giingong uyab sa inahan sa bata nga si Rommel “Tagalog†Balbuena, 40, nga usa ka karpentero ug molupyo sa naasoy nga lugar nga maoy responsable sa kamatayon sa iyang apo.
Sa pakighinabi sa Banat News sa lola sa bata nga si Doble nga taga Sitio Silangan,Brgy.Tinago ning syudad, siya mibutyag nga si Balbuena miadto sa ilang panimalay niadtong buntag sa Abril 29 aron mananghid nga iyang dad-on ang bata ngadto sa inahan niini nga si Jocelyn kinsa kasamtangang nabilanggo sa Mandaue City Jail sa kasong pagpangawat.
Giingong gitugtan kini ni Doble ug gipasidan-an nga ibalik ang bata pagka-Abril 30 kay iyaha kining hikayan kay mag-birthday ang apo nianang adlawa. Nianang adlawa gisugo niya ang usa sa iyang mga apo nga apason ang bata apan wala kini ipadala ni Balbuena kay siya ray mohatod niini.
Apan dangtan na lang og adlaw nga Domingo Mayo 5 wala pa gihapon ibalik ni Balbuena ang apo ni Doble hinungdan nga ila kining giadto ug didto nila nadiskubrehang gidala ang bata sa Cebu City Medical Center niadto pang Sabado sa buntag kay nakainom kini og kerosene ug namatay alas 5:00 sa hapon nianang adlawa. Matud pa nga di pa makamao moabli og botelya ang 2-anyos ilabi na ang pagyarok niini.
“Akong pagtuo ana, silay nagpainom sa pagtuo nga kadto tubig,†matud pa ni SPO4 Alex Dacua sa Homicide Section.
Si Balbuena kasamtangan nang gitanggong sa prisohan. (BANAT NEWS)