Hilom nga pag-abot sa mga balota sa Tuburan miresulta sa tension

CEBU, Philippines - Miulbo ang tensyon sulod kapin duha ka oras sa munisipyo sa lungsod sa Tuburan human magduda ang mga supporters ni mayoralty candidate Rose Suezo ug runningmate niyang si Daphnie Lagoon sa wa pagbutho sa ilang mga kaatbang sa peace covenant signing ug ang kalit nga pag-abot sa mga official ballots nga wa sila pahibaw-a niadtong Sabado sa hapon.

Una niini, dunay covenant signing sa simbahan sa maong lungsod tali sa mga kandidato nga naglakip sa habig ni incumbent mayor Democrito "Aljun” Diamante apan wala makatungha ang grupo sa administrasyon , sumala pa ni Sr. Insp. Florendo Fajardo nga gikahinabi sa Banat News.

Ang mga supporters sa duha  misulong sa Municipal Treasurer’s Office ug giingong gibali-bali og kasaba ang tresurero nga si Virgilia Lucero Undag kun nganong wa sila pahibaw-a sa pag-abot sa mga balota.

Matud pa ni PO1 Joseph Bejer mipa-blotter si Undag alas 6:00 pasado na sa gabii human sa tensyon, mireklamo kini sa pagtratar kaniya sa grupo ni Suezo.

Gidugang niini nga hasta ang election officer nga si Gilbert Pepito gigukod sa mga tawo maong midangop kini sa police station. Apan giklaro ni Fajardo nga si Pepito ilang gipahiklin sa ilang buhatan alang sa iyang seguridad.

“Gipangita siya sa mga tawo ni Suezo mao nga diri ni-proceed sa ato area (presinto) kay ang mga tawo nadunggan man nato nga nag-demand nga ipa-Comelec control ang lugar. Ato siya (Pepito) gi-secure ,” matud pang Fajardo.

Sila si Suezo ug Lagoon uban sa mga supporters miadto gihapon sa presinto ug mi-demanda nga ipa-esplikar sa ilaha ni Pepito nganong naabot ang mga balota nga wala sila makahibalo. Human mapasabot namauli na sila apan nagbutang og bantay sa mga balota.

Giingong nagduda sila kay wala manambong ang ilang mga kaatbang sa peace covenant signing ug sekretong nangabot ang mga balota.

Apan si Fajardo miingon way binuang nga nahitabo tungod kay na-timing lang gyud nga wala motambong ang habig ni Diamante sa pag-abot sa mga balota.

“Kami (PNP) tanan na caught off-guard kay abrupt kaayo ang pag-abot sa mga balota nga walay abiso,” matud pang Fajardo kinsa mibasol sa forwarder sa maong hitabo. Hinuon gipasalig niyang secured ang mga balota ug gwardiyado.

Samtang gihimakak ni Lagoon nga nagkagubot sila niadtong adlawa. Giangkon hinuon niyang wala sila mahimuot sa wala pagbutho ni Diamante.

"Pero na threatened gyud ang among mga supporters sa dihang nahibaw-an namo nga dili mopirma ang mayor sa peace covenant," matud pa ni Lagoon kinsa miangkong nagduda gyud silang dunay gubot nga mahitabo sa piniliay.

"Nganong mopirma man ko og peace covenant?. Dili ko mopirma ana. Sila man ang nagdala og gubot sa Tuburan, dili man ako," matud pa ni Diamante.

Nagkanayon si Diamante nga bastos kaayo ang mga supporters nila Lagoon ug kanhi mayor Rose Suezo sa ilang gipangbuhat niadtong Sabado.  (BANAT NEWS)