CEBU, Philippines - Human sa dul-an usa ka bulang pagtagotago gikan sa balaod , nadakpan na kagabii si Joavan Fernandez ang kontrobersyal nga anak ni Mayor Socrates Fernandez sa Talisay City.
Ang pagdakop kang Fernandez pinasikad sa usa ka bench warrant nga giisyu ni MTCC Judge Mario Manayon sa kasong slight physical injury.
Si Joavan nadakpan sa sitio Mansueto sa barangay Bulacao sa lugar diin magpuyo ang amahang mayor samtang kini nagsakay og motorsiklo kauban ang usa ka babaye.
Matud pa sa usa sa mga arresting officer nga si PO1 Edwin Campomanes ilang gipara si Joavan ug gimandoan sa paghapa. Atol sa pagrekisa nakuhaan kini og usa ka armas nga may upat ka buhing bala, granada, ug laing usa ka buhing bala sa kalibre 45.
Si Fernandez ning bag-ohay lang gipasanginlang mipusil sa usa ka Eduardo Largo Jr. maong gipasakaan siya og kaso bisan pa sa panghimakak niini sa pasangil.
Wa usab magpakita sa mga polis si Joavan sukad niadto.( /EIM) (BANAT NEWS)