CEBU, Philippines - Usa ka bata ug usa ka hamtong ang nangalumos sa managlahi nga dapit sa lalawigan sa Sugbo.
Ang bata nga nalumos mao si Junmark Rabago,9, diha sa dam site sa ultanan sa barangay Sto. Niño, Toledo City ug barangay Arpili,Balamban. Ang inahan sa bata nga si Lamelyn Rabago miingon sa kapolisan nga nananghid kini kay mangadto sa sapa uban sa laing mga bata ug kabanay aron mangisda.
Apan buntag nalang niadtong Sabado, gipahibalo si Lamelyn nga nakit-an ang iyang anak nga naglutaw sa sapa ug patay na.
Sa pakighinabi sa Banat News kang PO3 Dante Hilo sa Matab-ang Police Station, ang mga kauban ni Junmark nagtuo nga miuna na kini og pauli.
Sa laing bahin usa ka Porferio Matugas, 63, ang gituohang nalumos usab sa baybayon duol sa ilang balay sa sitio Dancar, Dunggo-an sa syudad sa Danao niadtong Sabado.
Nasuta sa kapolisan sa Danao City Police Station nga nakainom ug hubog si Matugas nga naligo niadtong tungora samtang nakig-inom sa amigo diha sa ilang balay.
Apan pagkahapon, nakit-an nalang kining milutaw sa dagat ug patay na pag-abot sa Danao City Provincial Hospital.
Laing nalumos mao ang usa ka Achilles Pega, 24 , taga sitio Dawis, Barangay San Sebastian sa lungsod sa Samboan.
Si Pega giingong hubog dihang misawom sa lawom nga bahin sa fish sanctuary sa barangay Kulase sa maong lungsod.
Matud ni PO1 Joseph Belangoy sa Samboan Police Station dihang nahinabi sa Banat News nangaligo kauban sa mga barkada ug nag-inom ug kini nahubog.
Namatikdan sab nga ang biktima hubog nang daan nianang pagkagabii pa dihang nikuyog sa pagpangaligo ug wala mabantayi nga misawom sa lawom nga bahin. Ang mga ig-agaw niini nga nakakita sa iyang lawas daling midala kaniya sa Malabuyoc District Hospital apan patay na kini. (BANAT NEWS)