Hi-tech CCTV gimuntar sa CH

CEBU, Philippines - Hi-tech nga mga CCTV camera gipang-instalar na sa nagkadaiyang kadalanan ug sa Cebu City Hall sa syudad sa Sugbo , kini ipakatap sa 20 ka mga intersections  ug duna say 10 nga ibutang sa city hall.

Ang maong mga CCTV camera ma-monitor pinaagi internet sa mga awtoridad ug migamit kini og fiber optic technology maong klaro ang kuha niini sa video footages.

Mahimo usab nga makontrol ang camera kung asa kini itutok ug i-zoom in ug i-zoom out sa buot nilang kuhaan og footages bisan gabii tungod kay infrared capable man kini ug maka-detect usab kung dunay sunog.

Ang proyekto gipasiugdahan ni Engineer Eugene Elizalde, chairman sa Police Coordinating and Advisory Council (PCAC).

Matud pa ni Elizalde P60  milyones unta ang budget alang sa proyekto nga ilang gipangayo apan P15 milyones lang ang naaprobahan sa Konseho hinungdan nga wala nila nalukop  pagbutang ang tanang kadalanan sa syudad  og CCTV.

Sa pagkakaron walo na ka CCTV cameras ang namuntar.  (BANAT NEWS)