CEBU, Philippines - Tulo ka mga lalaki ang nangalumos, duha kanila manag-agaw nga bakasyonista alas 5:00 sa hapon sa miaging adlaw sa La Conception Sitio Tongo, Brgy. Basdiot Moalboal.
Giila ang nalumos nga manag-agaw nga sila si Carlos Dominic Perjes, 18, residente sa Agan Homes, Isulan, Sultan Kudarat ug Jenrey Perjes, 21, molupyo sa Sto. Niño, Surallah South Cotabato. Ang duha giimbitar sa mga paryente diha sa maong lungsod sumala pa ni PO2 John Robert Sacan.
Matud sa imbestigasyon sa Moalboal Police nga alas-3 sa hapon nianang adlawa nangaligo ang banay sa duha sa lugar apan nagpabilin ang duha kay buot pang mangaligo apan wala na makauli. Ang grupo ni PO2 Ricky Berdejo sa PNP Maritime Police nga miapil sa pagpangita nabangalan ang lawas sa duha alas 8:00 na sa gabii nitidlom lima ka metros diin sila uwahing nakitang naglangoy-langoy.
Sa laing bahin, usa ka patay’ng lawas sa usa ka lalaki ang nakit-ang naglutaw-lutaw sa dagat alas-7 sa miaging gabii sa Brgy. Calero sa lungsod sa Lilo-an.
Ang biktima nga padulong na nga madugta nagsul-ob og puti nga t-shirt, color blue nga karsones, 5’5 ang gitas-on ug gibana-bana nga nagpangidaron sa 35-40.Wala pa matino si kinsa ang maong lalaki kansang patay’ng lawas gibutang karon sa usa ka punerarya sa Sitio Tiwasan, Brgy. Catarman sa maong lungsod. (Kristianne Marie Alcaria, CNU Intern/EIM) (BANAT NEWS)