Dalagang nalumos nabuhi

CEBU, Philippines - Nabuhi  ang  usa  ka  dalagang  nalumos  dihang  nabati  niini  nga ukoban  na  ang  iyang  baba  sa  usa sa  mga  rescuer  aron  aplayan  sa   “mouth to mouth resuscitation”  didto sa Marigondon Beach dakbayan sa Lapulapu  kagahapon.

Ang biktima  ginganlan  lang  og  Gina (tinuod ngalan gitago) dalaga ug residente sa Brgy. Gun-ob dakbayan sa Lapulapu.

Matud pa ni PO2 Winston Ybañez   nga mga alas 3:00  ang takna  sa kaadlawon nakadawat sila og tawag gikan sa usa ka  tourist police ug mipahibalo   kalabot  sa usa ka  babayeng  nalumos   didto sa Emerson beach resort sa Brgy. Marigondon .

Apan  dihang  miabot didto ang  kapolisan kalit nawagtang ang batan-ong dalaga   kay  naulian  diay  kini.

Miasoy   ang usa ka saksi ngadto sa kapolisan   nga  ang  biktima  kaubang  naligo  sa  iyang uyab sa maong resort  ug milangoy  kini  ngadto  sa lawom luyo  sa  kahubog  sa alak  niini.

Unya  kalit  kining  mitidlom  sa  ilawom  apan  naluwas  kini  sa kauban ug  gisakwat  ngadto  sa baybayon  nga wala  nay  panimuot  ug  nahukman  nga  ipa-mouth to mouth  sa mga  rescuer.

Busa pag-abot  sa rescuer  giandam  na  ang  kaugalingon  niini aron bulhotan    og  hangin  sa  iyang  baba  ang  baba  sa biktima  dihang  kalit lang  kining  nabuhi,  mitimbakuwas  ug  mikaratel  og  dagan.

Mapasalamaton ang kapolisan nga nasalbar  ang  biktima  nga  wala makatilaw  sa gininhawa  sa usa  ka  rescuer. (BANAT NEWS)