Canadian nat’l napalgang patay

CEBU, Philippines - Patay na nga napalgan  ang usa ka Canadian National sulod  sa iyang   giabangang lawak  sa dormitoryo  nga  nahimutang sa  Sitio Bagumbayan, barangay Tinago ,dakbayan sa Sugbo kagahapon  sa alas 8:30  sa buntag. Giila ang biktima nga si Jacques Daguerre, 51, diborsyado  sa asawa ug kasamtangang nagpuyo sa CLM-Cebu Lee Marketing Dormitory Llavilles.

Matud ni Mauricio Sardido, 28, ulitawo, nagpuyo usab sa maong dormitoryo ug lumad nga taga Leyte nga si Daguerre unom na ka tuig nga nagpuyo dinhi sa Sugbo apan niadto  lang Semana Santa kini nagsugod og puyo sa maong dormitoryo.

 Si Sardido midugang  nga namatikdan niyang gihilantan si Daguerre nianang gabii sa wala pa kini hipalging  patay.

Midugang si  Sardido nga ang  unang  nakakita  sa  langyaw nga  wala  nay  kinabuhi  mao si Rico Salvador nga kauban ni Daguerre sa samang andana   sa nahisgutang dormitory  nga  ilang  gipuy-an.

Matud ni  Salvador nga  nagbuy-od ang langyaw  sa katre  niini   tungod  kay bukas  ang pultahan  sa kuwarto  niini.

Samtang si Erson Villaran, 28, nadestino sa canteen sa maong dormitoryo mibutyag  usab  sa Banat News nga  mao  diay  hinungdan   wala monaog si Daguerre aron magpaluto sa iyang pamahaw  kay  may  nahitabo  diay  niini.

Ang caretaker sa maong dormitoryo nga si Concepcion Biangos  maoy mitawag  sa kapolisan  sa  Waterfront Police Station  ug gipahibawo  ang maong  hitabo.

Si PSI Pablito Sarno sa Waterfornt Police Station mibutyag nga ila pang  gipaabot  ang  resulta  sa autopsy  nga  gipahigayon sa Homicide Section sa Cebu City Police Office sa lawas  patay  sa maong  langyaw. (BANAT NEWS)