Checker naipit patay sa 2 ka van

CEBU, Philippines - Maayong pagkapisat sa usa ka checker sa usa ka kompanya human kini maipit sa duha ka container van nga iyang gi-check  sa Pier 6, ning dakbayan  sa Sugbo kagahapon   pasado ala 1:00  sa  hapon.

Ang biktima giila nga si Edgar Soliano, hingkod, ug giingong checker sa NMC Container Lines.

Sa pakighinabi sa Banat News ni Insp. James Cirilo ang chief supervisor sa Port Police  kini  miingon  nga ang biktima nag-check sa mga container vans sa maong dapit.

Apan giingong ang usa  ka trailer- truck nga gimaneho sa usa ka Bobby Mendoza gikatahong  kalit  nga miatras kini ug   dayon  miliko ingon   sa nagdali tungod usab kay aduna giingong giapas  nga lain  pang ikarga.

Matud pa ni Cirilo nga dihang naatrasan sa trailer truck ang usa ka container van, nga gihulagway niining office type van, mi-atras  usab kini ngadto sa biktima nga maoy na-ingnan sa  iyang  pagka-ipit.

Dugang pa ni Cirilo nga sa iyang pag-analisar sa nahitabo kang Soliano , iyang  naanalisar  nga  mahimong  nakabantay  ang  biktima  sa container  van  nga nagpaingon  kaniya  ug misuway unta kini sa paglihay apan naabtan  kini sa nagdagan nga van  ug wala  na  siyay  kaikyasan  kay  diha  man siya  magpundo  sa gi-check  niyang  lain nga nagpundo  nga  container van.

Nasuta ni Cirilo nga apektado  kaayo  ang  ibabaw  nga  bahin  sa lawas  sa biktima  ilabi  na  ang  iyang  dughan  nga maoy  napiit  pag-ayo  sa van.

Nasayran nga ang biktima gisuwayan unta paghatud  ngadto sa tambalanan apan gideklarar kini nga dead on arrival.

Sa pakighinabi sa Banat News ni SPO1 Rey Cuyos, investigator sa Homicide Section  sa kapolisan sa dakbayan  sa Sugbo  nga ilang giturn-over ngadto sa traffic police ang suspetsado  nga ilang   nadakpan  human  sa hitabo  aron kini  maimbistigahan. (BANAT NEWS)